الأستاذ فـ الجبل: أستاذ بالتضحية، مزوّد بالصبّر، ومحروم من التنقيط!

العربي الزيادي

نهار كيدوز الأستاذ الكونكور، كيدوز وهو كيحلم بالقسم، والسبورة، والتلاميذ لي كيعيطولو “أستاذ”، ولكن النهار لي كيتعيّن، كيكتاشف راسو ماشي فـ مؤسسة تعليمية، بل فـ “بعثة ميدانية” لمناطق نائية، كترجّعك للقرون الوسطى!

دابا نخليكم مع تقرير التنقيط ديال الأستاذ اللي خدم فـ الجبل، بلا مكتب، بلا ضوء، وبلا دُوش:

الحضور والانضباط:
الأستاذ كيوصل قبل الضوء، ومكينزل حتى يطيح الثلج. الطريق ديالو؟ غابة، وواد، وشوية ديال التبن على الكتف.
النقطة: 20/20… ولكن فدفتر الغياب ديال المديرية كيبان “تأخر 5 دقائق”.

التواصل مع الإدارة:
كيبغي يدير اتصال بالمدير، خاصو يطلع لجبل بحالو بحال الشبكة. يلقا نقطة تغطية، يدير مكالمة سريعة، ويهبط بحال سبيدرمان.
النقطة: 19/20… ولكن فالمذكرة الوزارية: “ضعف في التفاعل مع الإدارة”.

المشاركة في الحياة المدرسية:
دار النشاط التربوي؟ إييه، داره فـ القسم لي السقف ديالو خشب يطيح. نظم حفل؟ إييه، فـ الساحة اللي هي فـ الأصل زريبة قديمة.
النقطة: 18/20… ولكن فـ لجنة التقويم: “غياب المبادرة في تفعيل الأندية”.

المظهر العام:
لابس جلابة صوف، سباط بلاستيكي، وكاسكيط ديال الحملات الانتخابية، ولكن نقي ومرتب.
النقطة: 16/20… ولكن فـ ورقة الملاحظة: “عدم الالتزام بالمظهر اللائق”.

الاستقرار في المؤسسة:
عايش بوحدو، دار الكراء عبارة عن “صندوق بلا نوافذ”، وكيمشي يشري الما من العين ديال الدوار.
النقطة: 20/20… ولكن في الوزارة: “المعلمون يفضلون الانتقال دون مبررات وجيهة”.

العلاقة مع التلاميذ:
كيدرس ولاد الفقرا، كيعطيهم الطباشير مع الحب، وكيدوز ليهم كسرة ديال الخبز من الفطور.
النقطة: 20/20… ولكن فـ المنظومة: “نتائج التلاميذ لا ترقى للمستوى المطلوب”.

التحفيز المعنوي:
المدير قال ليه “شكرا”، ولكن الوزارة قالت ليه: “نتائجك ناقصة، خذ دورة تكوينية فـ الرباط”.
النقطة: -10/20… يعني سالينا بالتحبيط.

الخلاصة:

هاد الأستاذ ماشي موظف عادي، هاد راه بطل جبلي، فيه نفَس الصبّار، وفيه صمت النخيل، ولكن دايرين ليه التنقيط بحال شي موظف كاري مكتبه فـ الطابق الرابع وكيبقى كيتسنى الشاي.

المدرسة فالقرية كتبقى هي البوابة الوحيدة للأمل، ولكن الأستاذ فيها كيبقى هو المجهول رقم 1، خدام فـ صمت، ومحروم من الاعتراف، ومعرّض لتقارير جاهزة من مفتش ما شافه حتى فـ الكَـرام.

إيوا آش بقى؟
بقى غير نبدلو المنطق:
عوض ما نقطّوه، خاصنا نكرّموه.
عوض ما نسيفطوه للتكوين، نسيفطوه لسبا وشواطئ.
عوض ما نقولو ليه: “نتائجك ضعيفة”، نقولو: “راك معجزة بشرية وسط المعاناة”.