البيض ولى فقّاص: لما الفطور يصبح امتياز طبقي!

ضربة قلم

إذا كنتي حتى البارح كتفطر “بيض مقلي” كل صباح، وتفكر في مشروع الحياة، راه خاصك اليوم تعيد النظر:
البيض ولى كيتباع بحساب النبضة، وبطوابع ملكية، وكأنك شاري جواز سفر دبلومسي ماشي كتكولسترول طبيعي!
ارتفاع ثمن البيض فالمغرب ما بقاش مجرد رقم فالسوق، بل تحول لقضية وطنية تستحق لجنة برلمانية، بل وربما مجلس الأمن إذا بقينا ساكتين.
حيث المواطن المغربي صبح كيسوّل مول الحانوت بارتباك:
“عفاك… شحال دْ البيضة؟”
فكيجاوبه البقال وهو كيتفادى النظرة المباشرة:
“هاديك درهم و70… ولكن كاينة البيضة الصغيرة غير بدرهم ونص!”
فين وصلنا؟
البيض، اللي كان رمز البساطة و”الوجبة ديال آخر الشهر”، صبح اليوم مادة فاخرة تْعرض فـ vitrines بحال ساعات رولكس، ولا كيحتاج بطاقة أداء وكود سري.
والأسباب؟
نسخة مستهلكة من نفس التبريرات:
ارتفاع أسعار العلف
ندرة الإنتاج
موجات الحرارة
والدجاجة اللي قررت تولّي موظفة وتضرب على حقوقها وتعمل إضراب حضاري عن وضع البيض.
لكن الحقيقة كتشير أن منظومة الإنتاج كتعاني من قلة المراقبة وكثرة الوسطاء، اللي كيشريو من عند الفلاّح بثمن ويبيعو للمغاربة بثمن خيالي، والكارتيلات ديال “مافيا البيض” راها ساكتة وكتكركر الدجاج بحال الذهب.
والأخطر من هاد الشي كامل، هو أن المواطن ما بقا عندو حتى حق فالشكاية. إذا شكيت على غلاء الخبز، كيقولو ليك: “صبر راه خبز”.
وإذا تكلمت على البيض، كيجاوبوك: “ماشي ضروري تفطر، الصيام مفيد!”
واش فعلاً غادي يجي نهار نحتافلو فيه بعيد الميلاد ببيضة وحدة مشوية؟
واش غادي نغنيو لأولادنا: “بيضتي يا ميمتي” بدل “نم نم يا حبيبي”؟
واش العروسة فالموسم الجاي غادي تدير بيضة فوسط الطيفور وتقول “هدي هدية الزمان؟”
والبديل؟
ماشي نعملو مقاطعة خاوية بحال العادة،
ولكن نطالبو بـ:
دعم مباشر للمنتجين الصغار.
مراقبة صارمة للوسطاء.
إنشاء “تعاضدية وطنية للدجاج البلدي”!
وتذكير الحكومة أن البيض مشي كماليات، راه حق دستوري للفطور المغربي.
لأننا فبلاد، ولات حتى البيضة كتدير الكْريدي،
والمواطن كيسوّل راسو قدّام المراية:
“آش نقدر نشتري… البيضة ولا الأمل؟”