الجو معكوس والمزاج محكوس: نشرة طقس بنكهة مغربية حارة!
ضربة قلم
استعدوا أيها المواطنون الكرام، فالنشرة الجوية اليوم تشبه مزاج مسؤول تأخّر عن اجتماع مهم: باردة في البداية، سخونة في الآخر، وضبابية في الوسط!
الحرارة، الحمد لله، قررت تنزل شوية في معظم مناطق البلاد، لكن مازال كاين شي شبر في أقصى الجنوب الشرقي وبعض زوايا الصحراء المغربية اللي باقي فيها الجو “سخون ومكرفس” كأنه ما سمعش بالانخفاض اللي داز فالنشرة.
وبالنسبة لمحبي الضباب، راه الليلة جاكم العرض المجاني فوق السهول الشمالية والسواحل الوسطى، يعني بلا ما تحتاجو تمشيو للسينما، يكفي تطل من الشباك باش تعيش أجواء فيلم غامض.
أما المطر، فرهينة بمزاج السحب بين سيدي إفني والعيون، يعني إذا فاقت السحب ناشطة صباحًا أو في الليل، غادي تشخ شوية. وإذا بقات كسولة، راه “غادي تمشيها غير بالرذاذ”.
ومن بعد الزوال، غادي تشمر السحب الركامية على سواعدها فوق الأطلس الكبير والمتوسط والجنوب الشرقي، وتبدأ تطيّح شوية ديال الزخات، ويمكن تزيد فالسخونية وتضرب بشي برد وشي رياح بحال اللي كتعاند معاك فالسوق.
أما الرياح، راه صعية “نص مقلّقة”، غادي تدوز على السواحل الوسطى والصحراء وتحرك الكراسي، يمكن حتى الطناجر اللي ناسيها فالبالكون.
وبالنسبة للحرارة، فحدود 30 درجة مستمرة فبعض المناطق اللي مسكينة مازال كتفكر فالصيف، والباقي كيحاول يدخل الخريف بالزربة. اللي باغي ينعس مرتاح، يسكن فبلاصة كتسجل بين 16 و19 درجة… بحال يقولك: “أجي نعسو نساو الهم”.
أما البحر، فهو الآخر ما بقى فاهم والو: المتوسط مزاجو “قليل الهيجان إلى هائج”، والبوغاز “قليل الهيجان” بحال مدير فإجازة، والشمال كيتذبذب بين “هادئ نسبيًا” و”أش غادي يوقع من بعد؟”، أما الأطلسي فخرج من المجموعة وقرّر يهيج حتا يشبع.
خلاصة القول: خذ معك جاكيت وخوذة، وسطل صغير للمطر، واحتياط للبرد… وما تنساش مظلة قابلة للطيران!
يوم سعيد للجميع,
