شهادات طبية تجر طبيبا ووسطاء إلى السجن

ضربة قلم

إيوا شوف على فين وصلنا…
في مراكش الحمراء، البوليس ما بقاش كيوقف غير الشفارة ديال جامع الفنا ولا مروّجي “القرقوبي”، ولكن حتى أطباء القطاع الخاص و”المساعدات” ديالهم والوسطاء اللي قافزين بيناتهم. القضية بحال مسلسل تركي، غير الفرق أن البطولة هنا ماشي فالعشق الممنوع ولكن فـ”الشهادة الممنوعة”.

القصة باختصار: واحد الطبيب العام قرر يحوّل الختم ديالو لآلة طبع الأوراق الرسمية، واللي بغا شهادة طبية “فابور من الفحص”، مرحبا، غير خلّص ودّ الورقة. والوسطاء؟ ها هما وسط السوق كيدوزو البضاعة بحال شي “طماطم فالعروبية”: شهادة على قدّ فلوسك.

البوليس، اللي حتى هو ما بقاش عندو مع الفرجة، شدّ الوسيطين متلبسين بحال شي تلاميذ جابو النقلة من الأوراق المخفية. الأوراق عندهم والختم حاضر، والطبيب كيصوّر من بعيد. ما طولوش، مشاو للعيادة وجرّوه بحال شي نجم سينمائي فالعرض الأول ديال الفيلم، ومعاه المساعدة ديالو اللي باين كانت المسؤولة على “الإخراج الفني” ديال العملية.

دابا الأربعة كاملين رهن الاعتقال، كيتسناو البحث ديال النيابة العامة باش يشرح لهم بالتفصيل: واش هاد “الخدمة الصحية” عندها شي علاقة بالطب ولا غير تجارة بالورق والدمغات؟

واللي باقين كيحلمو بملفات إدارية بشهادة طبية وهمية، خاصهم يديرو update فالرأس: السوق تغلقات، والبضاعة تحجزات.