ضربة قلم
يعني بالله عليكم… واش هاد الشي ماشي بحال شي واحد كان كيبيع الما فالغربال، ومن بعد وقف فالسوق كيحاضر على جودة السدود؟!
أوزين اليوم كيقول للمغاربة: “جا الوقت ديال التغيير”… سبحان مبدل الأحوال! وكأن صاحبنا كان فـسويسرا طول هاد السنوات، ماشي وزير سابق عاش وسط نفس المسرحية السياسية اللي دابا ولى كينتقدها، بحال شي معارض ثوري خارج للتو من الجبال.
وزيد عليها، كيقول الحلول “ما كتحتاجش فلوس بزاف”… واخا! يعني المغرب كان غير ناقصو محمد أوزين، باش يكتشف أن الإصلاح ماشي بالصواريخ ولا بمضيق هرمز، بل فقط بـ”نية صافية” وشوية ديال الكبدة على الشعب!
أما الجملة الذهبية فهي:
“صوتوا على الناس اللي عليهم الكبدة عليكم”…
هنا المواطن المغربي وقف شوية، وحكّ راسو، وبدا كيقلب: واش هاد “الناس” كاينين أصلًا فالأحزاب؟ ولا غير شخصيات خيالية بحال “السندباد البحري” و”روبن هود”؟
السياسي المغربي عجيب…
كيقضي سنوات فالتدبير،
ومن بعد كيخرج فآخر الموسم بحال معلّق رياضي:
“خاص محاسبة المسؤولين!”
واش المسؤولين هبطو من المريخ؟!
هاد النوع ديال الخطاب كيخلّي المواطن، يحس بحال إلى شي مشبوه في السوق شدّ الميكرو وقال:
“السرقة كثرت خاص الأمن يتحرك!”
والأجمل أن الجميع ولى كيهضر باسم “نبض الشارع”…
الشارع المسكين، بقا غير بحال شي طبّال فعرس سياسي طويل:
كل حزب كيضرب عليه النغمة اللي بغى،
وفالأخير، المواطن كيرجع لدارو بنفس الجيب المثقوب ونفس الأسئلة القديمة:
فين الصحة؟
فين التعليم؟
فين القدرة الشرائية؟
وفين داك “التغيير” اللي كل خمس سنين، كينزل علينا بحال موسم “لالة العروسة”؟
